Work Hard! Travel Hard!

淡水老街除左有無敵可愛阿朗基咖啡之外，喺 Starbucks  右邊小路行前幾步，仲可以去貓雨咖啡館睇下。同一般 cafe 唔同嘅係老闆娘因為心愛貓咪，故此修養左一群流浪貓貓狗狗。推薦俾各位貓奴，如果去開淡水，記得要去貓雨咖啡廳同貓咪親密互動一下，亦支持下老闆娘照顧流浪貓狗嘅熱心。
淡水貓雨咖啡廳收養左兩隻流浪狗同埋超過二十隻以上貓貓。貓雨咖啡廳兩層高，一樓係，而二樓係逗貓區。一樓用餐區都幾狹窄，入到貓雨咖啡廳嘅第一個感覺係好多野，有好多同貓有關嘅擺設，牆上貼左好多貓咪相，感覺都幾色彩繽紛。
貓雨咖啡廳採取入場門票方式，門票 NT100，可以用嚟折抵消費。貓雨咖啡廳嘅咖啡同水果茶大約係 NT100-200，飲料都幾好飲，另外亦有提供餐點或小食。因為貓雨咖啡廳店入面有 D 貓味，所以建議大家去飲杯野同貓咪玩下就好。

坐喺一樓飲野，就會有唔同嘅貓店長過嚟同你 say hello，有時候狗狗唔抵得，都會過嚟要你摸下佢。而貓咪嘅數量更加係多到店入面每一個角落都有。

飲完杯野就上二樓同貓咪玩，店員特別提醒要記得帶埋隨身物品上去，因為放喺下面，可能有被貓咪尿尿嘅危險。上到二樓貓咪比下面更加多﹗而且更加可愛，活動嘅 area 亦比一樓大﹗

不過二樓有好幾個貓砂盆，而且通風差同埋有 D 紙箱，所以貓味比一樓嚴重。我認為貓雨咖啡廳老闆娘照顧流浪貓狗嘅熱心是真的值得要支持的。如果唔係老闆娘將淡水嘅流浪貓收養，貓咪喺不斷發展中嘅淡水流離失所真係幾危險。貓雨咖啡廳嘅貓咪亦都非常可愛，從來未去過一間貓雨咖啡廳更多貓嘅 cafe。可惜嘅係 cafe無將貓味問題處理好，大大減低左於店內 hea 耐 D 嘅意慾﹗

貓雨咖啡廳

地址：新北市淡水區公明街 61 號
電話：(02) 2620 0145
營業時間：週一至五: 12:00 - 21:30；週六至日：10:00 - 21:30   
Facebook 專頁：淡水貓雨咖啡廳